Covid-19 kaihhnawihah police-in Mi panga lakah thubuai an ziak lut

Ramhlun Venglai tlangval kum 22, Co­vid-19 a vei tih hmuh chhuah tak leh a ṭhiante pathumte lakah police-te'n thubuai an ziak lut a; Khatla East community quarantine centre-a awm mek ruihhlo petua puh Khatla South mi pakhat lakah pawh thubuai an ziak lut bawk.

Police thuchhuah tarlan danin, June 1, 2020 zan khan Ramhlun Venglaia home quarantine-a awm mek mipa kum 22 miin a ṭhiante mipa pathum - Ramhlun North mi kum 23, Ramhlun Vengthar mi kum 25 mi leh Ramhlun Venglai mi kum 24 mite chu a ATM card pein, pawisa la chhuak tur leh zu lei turin a tír a; a ṭhiante chuan zu leiin, an ṭhianpa home qua­rantine mek hnenah an pe a ni. A hnuah home quarantine mek chuan Covid-19 a vei tih hmuh chhuah a ni a, a ṭhiante pathum erawh endik an nih hnuah an kai ve lo tih hmuh a ni thung.

An chêt dan chu mi dang nunna tiderthâwng theia ngaih a nih avang­in mi palite lakah hian Bawngkawn Police Station-ah IPC Section 269/336 leh The Mizoram (Containment and Prevention of Covid-19) Ordinance, 2020 Section 5(9) hmangin thubuai ziah luh a ni.

Covid-19 vei mek chu ZMC-ah a awm rih avang leh a ṭhiante pathum pawh qua­rantine facility-a an awm mek avangin man an la ni lo a, remchang hmasaah man a, dan anga hmalak a ni ang.

June 6 khan Khatla East community quarantine centre-a awm mek mi pakhat chu Khatla South-a cheng mipa kum 33 miin damdawi ruih theih pek rûk a tuma sawi a nih avang­in police-te'n an chhui zui a; ruihhlo pek tumtu lakah hian Aizawl PS-ah IPC Section 269/336 leh The Mizoram (Containment and Prevention of Covid-19) Ordinance 2020 Section 5(9) hmangin thubuai an ziak lut a ni.

Ruihhlo pek tumtu chu swab sample endiknaah hripui a vei lo tih hmuh a ni a, mahse, quarantine facility-ah dah mek a nih avangin an la man lo.

Police thuchhuah chuan, "Covid-19 darh zel tur venna kawngah mi tinin tih tur kan nei ṭheuh a ni tih hre nawn ila. Sorkarin dan leh inkaihhruaina a siamte ṭha taka zâwm ṭheuh hi kan mawhphurhna a ni," an ti.