Nicolas Maduro-an US palai a hnawtchhuak

Venezuela President atana thlan nawn, Nicolas Maduro chuan president atana thlawn nawn a nih chungchang US in pawm lo a, an ram hrekna thar a siam leh hnuah, Venezuela rama US diplomat awm chu a hnawtchhuak.

President Maduro chuan Thawh-lehni-a TV-a thu a sawiah, US palai Todd Robinson leh a deputy Brian Naranjo-te chu darkar 48 chhunga an ram chhuahsan tura thu pek an nih thu a sawi. US chu an rama roreltu a ni lo tih a sawi.

Maduro chuan Robinson leh Naranjo-te chuan president thlanna neih zawh tak kha tihbuai tumin, eptu lamte chu candidate siam lo turin an nawr niin a sawi. Naranjo chu Venezuela-a CIA hotu niin a puh bawk.

Venezuela president thlanna neih tak kha eptu pawl liante chuan an boycott a, inthlan buatsaih hi ram hrang hrangten sawiselin, result pawh an pawmpui lo tih an sawi a ni. He inthlanah hian eptu hruaitu langsarte chu inthlan chuh thei loa dan an nih avangin eptu party tam zawkin candidate pawh an siam lo a ni. Vote thlak pawh an tlem a, vote tla hi 52% vel chauh a tling a, Maduro hian vote tla aṭanga 68% a hmu pha a ni.

US chuan Venezuela president thlan buatsaih chu a pawm loh thu sawiin, President Donald Trump chuan Venezuela ram hrekna thar hi a siam a ni. Hei hian Venezuela president a ti thinur hle a, an rama US palai awmte a hnawtchhuak ve nghal a ni.

European Union pawhin Pathianni-a Venezuela inthlan buatsaih hi a pawmpui lo tih sawiin, hrekna thar siam a tum thu a sawi bawk.