N Korea-in S Korea reporter-te nuclear test site tlawh phalsak

North Korea chuan South Korea reporter-te chu Punggye-ri nuclear test site kharnaa an tel a phalsak.

North Korea ram hotu lu ber, Kim Jong-un chuan thla hmasa khan nuclear test site hi an khar tur thu sawiin, a kharna hunah pawh ram ṭhenkhata media mite an tel phalsak an nih tur thu a lo sawi tawh a ni. Mahse tunhnaiah US-South Korea sipaiten nunchan an zirho avanga SKorea nena high-level talk an neih tur a ṭhulh hnuah South Korea reporter-te chu nuclear test site tlawh phalsak zingah a telh duh lo a ni.

Ram danga aṭang nuclear test site kharna hun hmannaa tel tura kal reporter-te chuan Thawhlehni khan North Korea-a Wonsan khua an thleng tawh a, hetihlai hian SKorea journalist-te erawh chu visa pek an nih tak loh avangin Beijing lamah an kir leh a ni. Mahse South Korea unification ministry chuan SKorea reporter pariatte tan hian ngen sak lehin, nimin khan North lam hian lo pawmsak ta a ni.

NKorea nuclear test site khar hun tur hi a ni tak sawilan a ni lo a, May 23-25 inkar hian khar a nih rin a ni. North chuan he hmun khar hun hmanpui tur hian China, Russia, US, UK leh SKorea aṭangin journalist-te a sawm a ni.

Nuclear test site kharna-ah hian a tunnel zawng zawng pawh tihchhiat vek a ni dawn niin NKorea chuan a sawi a, research facility leh a site venna hmun siamte pawh ṭhiah a ni bawk ang. Satellite image aṭanga a lan danin a tichhiat hna hi thawh ṭan a ni tawh a ni.