Myanmar-ah Rohingya helten Hindu mi tam tak tihlum

Amnesty International-in nimina report a tihchhuahah, kum 2017-a Maynmar-a Rakhine state-a buaina a chhuah khan Rohingya Muslim helte chuan Hindu khuate beiin mi tam tak an tihlum niin a tarlang.

Report-in a tarlan danin, he pawikhawihna thlen hun hi kum 2017, August 25 a ni a, hemi ni vek hian Rohingya helte hian police post-te beiin hei vang hian Rakhine state-ah buaina nasa tak a thleng zui a ni. Myanmar sipaite hian helte hi bei letin, sipaite beihpui thlakna vangin Rohingya Muslim mi nuai sarih vel zet chu Bangladesh ramah an tlanchhia a ni.

UN chuan Myanmar sipaite beihpui thlak hi Rohingya mite thenfai tumna niin a puh a, sipaite chu civil mi tam tak thihna leh an khua halsaknaa mawhphurhtuah a puh a ni. Hemi rual hian Rohingya helte chu pawikhawihna nasa tak thlenah puh an ni bawk a, mahse he puhna hi Rohingya helpawl Arakan Rohingya Salvation Army (ARSA) chuan a pha thung.

Amnesty International chuan Rakhine state-a thil thleng chhuina thar berah Rohingya helte hian Hindu mi 53 zet chu Kha Maung Seik khuaah rawng takin an tihlum a, an zinga a tam zawk chu naupang an ni tih a sawi.