France President policy duh lohna lantirin kawng zawh

France President Emmanuel Macron-an economic reform siam a tum dan duh loin, Thawhlehni khan public sector worker 15,000 velin Paris-ah kawng an zawh.

Kawngzawhte hi zirtirtu, police officer, transport staff leh air traffic controller-te an ni a, sorkar an demna thuziak te an keng a ni. Kawngzawhte chuan sorkar chu hlawh la tlem zawk leh hnathawh nasa zawkte bitumah puhin, hnathawktuten an dikna chanvo neihte tihchhiatsakah an puh a ni.

Nawrh huaihawtte chuan sorkar chu public sector kalphung tihchhiat a tum avangin anmahni tan chauh ni lo, mitin tan an beih let a ngai tih an sawi.

President Marcon hian an ram leiba neih tihtlem a nih theih nan leh, hna thar siamna tur kawng hawnna turin public sector hnuaia hna 120,000 tihtawp a tum a ni. President chuan hnathawktuten a ruahmanna siam hi duh loin nawrh huaihawt mah se thlak danglam a tum lo tih sawi.

Nikum May thlaa France President atana lakluh a nih hnuah, Marcon hian sum dinhmun siamṭhatna turin policy eng emaw zat a thlak tawh a, work law thar pawh a siam tawh a ni. National railway siamṭhatna tur pawh National Assembly-ah pass a ni tawh a, tunkar hian Senate-ah sawiho a ni ang.