Malaysia-in MH370 zawn hna titawp dawn

Malaysia sorkar chuan kum 2014, March 8 aṭanga chin hriat loha bo, mi 239 chuanna Malaysia Airlines thlawhtheihna, flight MH370 zawn hna chu karleh Thawhlehni hian a titawp tawh dawn.

Fligth MH370 hi Kuala Lumpur aṭanga Beijing pana a thlawh laiin chin hriat lohin a bo a, hun rei tak zawn ni mah se tun thlengin a awmna chin hriat ala ni lo. Ram hrang hrangten an zawnpui hnuah Malaysia hian US private firm, Ocean Infinity ruaiin a la zawn chhunzawm reng a ni. Ocean Infinity hian Indian Ocean chhim lamah thlawhtheihna hi a zawng a, a hmu a nih chuan Malaysia sorkar hian dollar maktaduai 70 pek a lo tiam tawh a ni.

Malaysia Prime Minister thar Mahathir Mohamad chuan Nilaini khan cabinet meeting neiin, Ocean Infinity nena contract an siam chungchang hi an ennawn dawn tih a sawi. Kar leh Thawhlehni-a an contract siam tawp hunah pawhsei an tum tawh lo tih a sawi a ni.