Pakistan varsity-in mipa leh hmeichhiate khuahkhirhna siam

Pakistan-a Bahria Univeristy chuan an campus pathum–Karachi, Lahore leh Islamabad-ah zirlaite tana hriattirna tichhuakin, hmeichhia leh mipate chu an awm tlang a nih pawhin an inkar inches 6 talin a inhlat tur a ni, a ti.

Hriattirna tihchhuahah hian department head zawng zawngte chu zirlai mipa leh hmeichhiate chu an ṭhut leh dinho pawhin inches 6 talin an inhlat tih enfiah zel turin a ti a, he dan bawhchhiate chungah action lak a nih tur thu a sawi bawk. Hei bakah hian zirlai mipa leh hmeichhiate chu in khawih a khap bawk.

Bahria University thupek siam hian sawisel a hlawh zui hle a, Federation of All Pakistan Universities Academic Staff Association (FAPUASA) pawhin a hriattirna tihchhuah hi sut leh nghal turin a ti a ni. Mahse University thupuangtu Mehwish Kamran chuan zirlaite nunchang thununna tura siam an nih thu a sawi a, thil dik lo a awm lo niin a sawi.

Nikum khan Islamabad-a International Islamic University chuan zirlai hmeichhiate thawmhnaw hak tur chungchangah khuahkhirhna siamin, kawr nghawng zau, ban bul, skinny jeans, tights, capri pant hak a khap bakah, makeup hman a khap a, tlereuh inbel nasat leh pheikhawk sang bun a lo khapsak tawh bawk.