UN-in North Korean travel ban a hlip

United Nations Security Council committee chuan June thlaa Donald Trump leh Kim Jong-un ten Singapore-a summit an neih tur atan North Korea official-te zin chhuah khapna a siam chu a hlip.

Singapore sorkar chuan kar hmasa khan UN scantion committee hnenah hian June 12-a Trump-Kim summit neih tur leh, hemi atana inbuatsaihna preparatory meeting-a NKorea palaite an tel theihna turin NKorea official-te kal phalsak tur hian a lo ngen tawh a ni.

UN-a Singapore Ambassador Burhan Gafoor chuan summit neih tur hi NKorea nuclear programme chungchang chinfelna hun remchang ṭha tak leh, Korean peninsula-a boruak muanawm a awm theihna tura hmalakna pawimawh tak niin committee hi a hrilh a ni. Summit neih tura SKorea palai kal tur zat erawh sawilan a ni lo.

UN hian NKorea-in nuclear test a neih avang leh UN hrekna a palzut avangin official 80 leh pawl 75 te hrekna chu siamin, an zinchhuah a khapsak bakah ram danga an thil neihte pawh khawih chet theih lohin a hreksak a ni.