NKorea-in US Vice president chhang let

US Vice President Mike Pence-a’n Trump-Kim meeting neih tur chungchanga a thusawi chu North Korea chuan chhang let nghalin, Mike Pence thusawi chu thil atthlak lutuk nia sawiin, inbiakna neih tur hi a hlawhchham a nih chuan nuclear hmanga inbeihna thleng thut thei a nih thu a sawi.

North Korea senior official Choe Son-hui chuan NKorea chuan inbiakna nei tur hian US chu a ngen lui dawn lo a, tel ngei tura nawr luih pawh a tum dawn lo tih a sawi.

Tunhnaiah ram pahnihte hian June 12-a Trump-Kim meeting neih tur chu sawnhlat emaw, ṭhulh emaw a ni thut thei tih an lo sawi ve ve tawh a ni.

NKorea chuan US hian a nuclear ralthuam siamte titawp nghal tura a nawr lui zel a nih chuan meeting neih tur hi a ngaihtuah ṭha leh dawn tih a sawi. Hetih lai hian US President Donald Trump chuan meeting neih tur hi kaltlangpui a nih dawn chuan NKorea chuan an thil phutte a zawm a ngai tih a sawi thung.

NKorea state news agency KCNA chuan US Vice President Mike Pence hian tunhnaiah ṭawngkam mawi lo leh huatthlala tak tak a sawichhuak a, NKorea chu Libya dinhmun anga ding maithei a nih thute a sawi a ni, a ti. Choe Son-hui chuan nuclear ralthuam nei ram NKorea leh Libya ram a tehkhin chu thil awm ang lo, atthlak tak a ni tih a sawi bawk.