Donald Trump-an Kim nen summit neih tur ṭhulh
US President Donald Trump chuan June 12-a North Korea ram hotu Kim Jong-un nena meeting an neih tur aṭangin a inhnukdawk tih a sawi.
Ningani khan Kim Jong-un hnenah lehkha thawnin, Donald Trump chuan June 12-a Singapore-a meeting neih tura ruahmanna lo siam tawh chu tun hnaia NKorea-in thu dengkhawng tak tak a tihchhuah leh a chetdan avangin kaltlangpui theih a ni dawn ta lo tih a sawi a ni.
Trump chuan, "Khawvel leh North Korea chuan muanna leh hausakna siamna hun remchang a hloh ta a ni. Hetiang hun remchang ṭha hloh a nih hi thil lungchhiaththlak tak a ni", a ti. Meeting hi kaltlangpui ni se chuan US President ṭanglai leh North Korea hotuin meeting an neih hmasak ber tur a ni.
Meeting ṭhulh a nih thu thuchhuah a siam hnu hian Trump chuan NKorea chu atthlak taka a che a nih chuan chhang let turin US sipaite an inpeih thu a sawilang nghal bawk. Trump chuan, "Kan sipaite hi khawvela chak ber an ni a, tunhma zawng aiin a ṭul huna che chhuak turin an inpeih tawh a ni", a ti. Pentagon pawh North Korea an che a nih chuan a ṭul anga lo bei let tura a inpeih thu a sawi bawk.
Donald Trump chuan Kim nena meeting an neih tur chu a ṭhulh thu sawi mah se, NKorea-in summit neih tur chungchanga a rilru thlak a, inbiakna neih a duh a nih chuan hrilh hreh lo turin a chah a, an inhawng reng tih a sawi nghal a ni. Trump hian summit neih hma hian NKorea chu a nuclear weapon programme titawp a, a ralthuam neihte tichhe turin a phut a ni.
Hetih lai hian South Korea President Moon Jae-in chuan President Trump-an meeting neih tur a ṭhulhna chhan hi hriatfiah tumin hma ala mek a, security official-te chu emergency meeting a neihpui nghal a ni. Moon-a thupuangtu Cheong Wa-dae chuan President thiltum tak hi hriat tumin an ngaihtuah mek niin a sawi.
US President-in meeting neih tur a ṭhulh mai chu pawi an tih thu NKorea chuan a sawi a, NKorea Vice-foreign minister Kim Kye-gwan chuan NKorea chuan ram pahnihte inkara harsatna awmte chingfel tura inbiakna neih hi a duh reng a ni, a ti. Trump-a thutlukna siam chuan Korean Peninsula-a boruak muanawm leh ngelnghet a awm theih beiseitu ram hrang hrangte pawh a ti lunghnur hle niin a sawi bawk.