Trump-Kim meeting neih tur kaltlangpui dawn ; Moon leh Kim-ten meeting nei

US President Donald Trump chuan North Korea ram hotu, Kim Jong-un nena June thlaa meeting an neih tur chu NKorea chetdanah a lungawi loh thlak avangin a lo cancel tawh a, mahse Inrinni khan meeting neih hun tur hi tihdanglam a ni lo tih sawiin, inbuatsaihna pawh tluang takin a kal mek niin a sawi leh.

Donald Trump chuan June 12-a Singapore-a meeting neih tura ruahman chu thlak danglam ala ni lo tih a sawi. Tunkar tawp lamah hian meeting neih tur inbuatsaihna atan hian advance team official-te chuan Singapore hi an pan dawn niin White House chuan a tarlang bawk.

Kar kalta Ningani khan Trump hian North Korea lam ṭawngkam chhakchhuah leh awmdan a lungawi thlak loh tia sawiin Kim nena meeting an neih tur hi a ṭhulh thu a sawi. Mahse a tuk Zirtawnpni-ah NKorea ram hotu nena inbiakna neih tur chu kalpui a nih tur thu a sawi leh a ni.

Trump-an meeting ṭhulh a nih thu ziak a thawn hnuah, NKorea Vice Foreign Minister Kim Kye Gwan chuan US nena an inkara harsatna awmte chingfel tura US nena inbiakna nei turin an inpeih reng tih a sawi a ni.

Hetih lai hian puangzar lawk loin Inrinni khan South Korea President Moon Jae-in leh North Korea hotu Kim Jong-un te chuan ramri bula Panmunjom khuaah meeting ṭum hnihna an nei.

South Korea presidential official chuan ram pahnih hruaitute hi ram bul, NKoraea lama Pannunjom-ah hian chawhnu dar 3-5 chhung meeting an nei tih a sawi. Korea ram pahnih hruaitute hian April 27-a Panmunjom Declaration an lo siam tawh kalpui dan tur te, Trump-Kim summit neih tur hlawhtling taka neih a nih theih dan turte an sawi dun niin Blue House chuan a tarlang.

April 27 khan Moon leh Kim hi SKorea lama Panmujon-ah inhmuin, Korean Peninsula-a boruak muanawm a awm theihna tura hmalak dan turte an lo rel tawh a ni.