July 25-ah Pakistan inthlanpui nei dawn
Pakistan inthlanpui neih hun atan July 25 tihchian ani ta tih President Mamnoon Hussain thupuangtu chuan a sawi.
Election Commission of Pakistan (ECP) chuan an ram inthlanpui neih hun tan July 25-27 inkar a rawt a, he rawtna hi President Mamnoon Hussain hnena thehluh a nih hnuin President chuan inthlan neih hun atan July 25 hi a pawm ta a ni. Rorellai PML-N sorkar hi May 31-ah a term a tawp dawn a, sorkar term a tawp hunah thuneihna chu caretaker kutah dah a ni ang.
Inthlanpui neih turah hian rorellai PML-N leh cricket star hlui Imran Khan-a party Pakistan Tehreek-e-Insaf party te chu inkhing tura rin an ni.
PML-N hotu leh prime minister hlui Nawaz Sharif-a chu nikum July thla khan eiruka puhna thubuaiah Supreme Court chuan PM a nihna aṭangin a lo ban tawh a, hei bakah a damchhunga politics khelh a khapsak bawk. Kumin April thla khan Foreign Minister Khawaja Asif pawh an ram election law palzuta puh a nih avangin court chuan minister anihna aṭangin a lo ban tawh bawk.