Italy PM atana ruat a bang

Italy Prime Minister atana ruat, Giuseppe Conte chuan President Sergio Mattarella-an economy minister atana a thlan a pawmpui theih loh vangin PM a nihna aṭangin a bang.

President Mattarella hian kar kalta Nilaini khan Conte hi PM atana ruatin, sorkar siam turin a hun a pe zui nghal a ni. Mahse Conte-an a cabinet minister tura a thlan zingah, economy minister tura a thlan Paolo Savona chu Eurozone aṭanga Italy chhuah tir tuma beitu a ni tiin a pawmsak lo. Hei vang hian sorkar siam loin Conte hi a bang zui nghal a ni.

Italy hian March thlaa inthlanpui an neih hnuah political party zingah sorkar siam tura majority nei pha an awm loh avangin tun thlengin sorkar nghet a la ding lo a, Five Star Movement leh far-right League-ten ṭangrual sorkar siam tumin Conte hi PM atan an nominate a ni. President Mattarella chuan PM atana Conte rawtna hi a pawm tawh a, Pathianni khan meeting neiin Conte-an cabinet member list a siamte an endun a ni.

President-in Conte-a rawtna a hnawlsak hi ṭangrual sorkar siam tumtu, Five Star Movement leh League hruaitute chuan an sawisel a, Five Star Movember hruaitu Di Maio chuan Mattarrella thutlukna siam chu pawm theih a ni lo tih a sawi. League hruaitu Salvini pawhin party pahnih thawkdunte chuan an duh ang minister an ruat thei tur a ni tih a sawi bawk. Mahse Italy ram dan hnuaiah president hian cabinet member atana ruatte chu hnawl turin thuneihna a nei a ni.

Mattarella chuan Conte hi nimin khan meeting a neih pui leh a, an thurel dan azirin inthlan ṭhat neih a nih dawn leh dawn loh a puang ang.