Summit neih tur atan United State leh North Korea official-te inhmu

US President Donald Trump leh North Korea hotu Kim Jong-un ten June 12-a meeting an neih tur atana inbuatsaihna peng pakhat atan Pathianni khan America leh NKorea official-te chu Korea ram pahnih inri-na bulah an inhmu.

President Trump hian kar hmasa Ningani khan Kim Jong-un nena meeting an neih tur hi a ṭhulh thu a sawi a, mahse a tukah a thutlukna hi a siamṭha leh a ni.

Singapore-a ram pahnih hruaituten meeting an neih tur hi tluang taka kalpui a nih theih nan inbuatsaihna a kal mek a, Pathianni khan Korea ramri-a Panmunjom khuaah US palaite chuan NKorea official-te hmuin, meeting neih dan turte hi an sawiho a ni. White House thupuangtu Sarah Sanders-i chuan NKorea official-te an hmuh bakah, Pathianni zing khan 'pre-advance team' chuan Singapore an pan bawk niin a sawi.

Korea ramri-a meeting neihah hian US palaite hi South Korea-a US ambassador hlui Sung Kim-an a ho a, Pentagon official Randall Schriver pawh a tel. North Korea team hi vice foreign minister Choe Son Hui hoin an kal a ni. Nimin bakah vawiinah Panmunjom-a Tongilgak-ah meeting hi neih chhunzawm a ni ang.