Israel-in Palestinian pawl 5 firfiak pawlah puang

Israel defence ministry chuan Palestinian NGO panga chu 'terrorist organisation' ah a puang thar.

Terrorist organisation-a puante hi - Union of Palestinian Women's Commi­ttees (UPWC), Addameer, Bisan Center for Research and Development, Al-Haq, Defenxe for Chiljdren International - Palestine (DCI-P) leh Union of Agricultural Work Commottees (UAWC) te an ni.

Defence ministry chuan heng pawlte hi kum 1970 chhoa thlawhtheihna hijack ṭhintu, Popular Front for the Liberation of Palestine (PFLP) senior member-ten an thunun niin a sawi. Heng NGO-ten European sorkarte hnen aṭanga sum an dawnte chu PFLP chetlakna tur atana hman thin a nih tih a sawi bawk.

Israel defence minister Benny Gantz chuan sorkar leh pawl hrang hrangte chuan firfiaka chetna kawnga inhnam­hnawih pawlte nena inhnimhnaih an duh lo a ni tiin, PFLP chu US, Canada, Australia, Japan leh European Union-ten firfiak pawlah an lo puang tawh a ni, a ti.

Israel sorkar thutlukna siam thar hi Palestinian ram chhung leh ram pawn lamah sawiselna a nasa nghal hle. Activist-te chuan heng NGO-te hi Palestinian mi tam takin chhawmdawlna an dawn theihna kawng awmchhun a nih thute an sawi.

Amnesty International leh Human Rights Watch chuan thuchhuah inṭawm siamin, Israel sorkar thiltih chu international human rights movement beihna a ni, a ti. UN High Commission for Human Rights pawhin he thutlukna siam hian a ṭhawng hle tih sawiin, boruak ṭha a awmna tura an hnathawh mek tichhe thei a nih thu a sawi. US state department thupuangtu Ned Price chuan heng NGO te firfiak pawla puan an nih chhan kimchang zawk chu Israel sawipui an tum tih a sawi.