Hindu-te beihna vanga lungawi lohna lantir chhunzawm zel

Bangladesh-a Hindu temple leh chenna in beihna rapthlak tak thleng vangin kar liamta Inrinni khan lungawi lohna lantir chhunzawm leh a ni.

Bangladesh khawpui, Dhaka leh hmun dang 60 chuangah lungawi lohna hi lantir a ni. Nawrh huaihawttu zinga mi, Bangladesh Hindu-Buddhist Christian Unity Council hruaitu Rana Dasgputa chuan thuneitute chuan hnam tlem zawk, a bikin Hindu-te chu an venghim zo lo niin a sawi. Kar liam taa Hindu-te beihna thlengah khan mi pasarih an thi a ni.

Dasgupta chuan, "He inbeihna thlengin a tum ber chu tun hma lama an lo tih tawh anga hnam tlem zawkte an chenna aṭanga um chhuah a ni," a ti.

Lungawi lohna lantirtute hian thuneitute hnenah ngenna hrang hrang 11 an thehlut a, heng zingah hian inbeihna thlen dan chiang zawka chhui chiangtu tur judicial commission din te pawh a tel a ni.

Police-te chuan pawikhawihna thleng kaihhnawihah hian mi 500 chuang man an nitawh tih an sawi a, heng zingah hian Hindu pathian mal chunga Quran lo dahtu nia puh pawh a tel. Buaina chhuak zel tur veng turin paramilitary border guard-te pawh dah belh an ni tih an sawi.