US-ah hri kai damdawi-ina dahluh ngai an pung chak

US-ah ni ruk liam ta chhung khan a zawnin hri kai thar nitin mi 1,00,000 chuang an awm ziah ang a ni a, hemi chhunga hri kai hmuh thar zinga mi 59,000 chu damdawi-inah dah luh an ni bawk. 

US-ah hri leng hian zual lam a pan chhoh leh vang leh, damdawi-ina enkawl ngai an pun chak leh tak avangin state eng emaw zat chuan Thawhlehni aṭang khan hri darh tur venna atan inkhuahkhirhna an hmang leh ṭan. Damdawi-ina enkawl ngai an pun belh zel avangin damdawi-in leh a hmunhma indaihlohna a thleng chho mek a ni. 

California state health and human services secretary Dr Mark Ghaly chuan kar hnih liam ta chhungin an state bikah hri kai, damdawi-ina enkawl ngai hi 32% in a pung a, hri kai enkawl mek zinga intensive-care unit (ICU)-ah dah ngai pawh 30% in an pung tih a sawi. Hei vang hian state chhunga county pathum - San Diego, Sacramento leh Stanilaus-te chu khuahkhirhna thlahdul an inhawnte pawh titawp leh rih tura tih a ni. Restaurant leh gym-ah kalkhawm phal a ni a, sakhaw biakna hmun te leh inchhunga awmkhawmna hun buatsaih khapsak an ni bawk. 

Minnesota governor Tim Walz pawhin hri kai thar leh, hri kai zingah damdaw-ina dah luh an pun chak leh avangin state chhungah inkhuahkhirhna hman a ni leh dawn tih a puang. Zirtawpni aṭang hian bar leh restaurant-ah dine-in service kalpui khap a ni a, mi 10 aia tam awmkhawm khap a ni bawk ang. 

Illinois-ah pawh Thawhlehni khan an state-a hri kai tam ber ni a thleng a, hri kai thar zinga a tam zawk chu damdawi-ina dah luh an ni tih govenror JB Pritzker chuan a sawi.  

Iowa governor Kim Reynolds pawhin  hri kai thar an pun chak chhoh zel avang leh, heathcare system dinhmun a derthawn chhoh avangin hri darh tur venna atan punkhawm a khap a, pawn chhuahnaah mipuite chu mask vuah vek turin a ti bawk. 

US health secretary Alex Azar chuan hri kai zingah damdawi-ina enkawl ngai an pung zel chu ngaihven zui ngai tak a nih thu leh, hri hluar zualna hmuna medical facility indaih lohna pawh a thlen chhohmek thu a sawi. Hei vang hian health official-te chuan a ṭul huna hman theih tura temporary medical facility siam turin hma an la mek tih a sawi bawk. 

Thawhṭanni khan US ram hmun hrang hranga damdawi-inah Covid-19 kai enkawl mek mi 59,000 chuang an awm a, hei hi hri kai damdawi-ina enkawl an tam ber ṭum a la ni. 

US-a infectious disease expert Anthony Fauci chuan thlasik lo thleng turah hian Covid-19 hri kai an pun nasat a rinawm thu a sawi. .

Health official-te chuan mipui punkhawmna aṭangin hri kai hi an tam thu sawiin, hri kai zinga taksa lama harsatna nei lo, asymptomatic-te chuan hri hi an thehdarh nasa niin an sawi. Hei vang hian asymptomatic-te pawh hriat chhuah ran an nih theihna atana test tam zawk neih zel a ṭul thu a sawi bawk. 

American Health Care Association and National Center for Assisted Living president leh chief executive, Mark Parkinson chuan nursing home hrang hrangah hri kai an pun thu a sawi. September thla laihawl vek aṭang khan Midwest bikah chuan nursing home-a hri kai punna hi 120% te a tling a ni.

Health secretary Alex Azar chuan Pfizer Covid-19 vaccine chu December thlaah America mite tan sem chhuah beisei a nih thu a sawi. 

Pfizer Inc chuan German partner BioNTech SE nena vaccine an siam hi enchhina an neih tawhah Covid-19  hri danna atan 90% in a hlawhtling niin a sawi. Kar leh lamah chuan emergency-a hman a nih theihna tura phalna pawh US Food and Drug Administration-ah dil an tum tih a sawi a ni. 

FDA in phalna a pek hunah, US hian Pfizer vaccine hi  thla tin dose maktaduai 20 vel a dawng thei dawn a ni. US sorkar chuan Pfizer vaccine dose maktaduai 100 atan contract, USD dollar tluklehdingawn 1.95 hu a lo siampui tawh a ni.