Iraq parliament-in vote tla ṭhenkhat chhiar ṭhat a remti

Iraq Parliament chuan May 12-a parliament inthlan neihah vote tihchingpen a awm nia sawi a nih avangin vote tla zinga 10% chu chhiar ṭhat a remti.

Vote tihchingpen chungchanga complaint lut ngaihtuah hian Parliament emergency session neih a ni a, MP 165 te chuan vote tla aṭanga 10% chhiar ṭhatna tur draft bill siam chu an pass zui nghal a ni.

Vote chhiar ṭhat tur, 10% aṭang hian thil dik tawk lo a awm tih hriatchhuah a nih chuan ram puma vote tla-te chhiar ṭhat vek a ni ang tiin Parliament chuan a sawi. Hei hi kalpui a nih chuan ram pawn lama polling center leh refugee camp-a vote tlate chu cancel a ni ang.

Iraqi Independent High Electoral Commission (IHEC)-in May 19-a Parliament inthlan result a tihchhuahah, Shiite cleric Moqtada al-Sadr0a kaihhruai al-Sairoon Coalition chuan seat la hnem berin, parliament seat 329-ah seat 54 a la a ni. Hadi al-Ameri-a kaihhruai al-Fath Coalition chuan seat 47 lain pahnihna a ni a, Prime Minister Haider al-Abadi kaihhruai al-Nasr Coalition chu pathumna chauh ani pha a, seat 42 a la a ni. Vice President leh prime minister hlui Nuri al-Maliki kaihhruai State of Law Coalition chuan seat 25 a la bawk.

Party hrang hrang, a bikin Kurdistan bial leh Kirkuk province amit chuan inthlan neih hi a felfai tawk loin, vote tihchingpen a nih thu an sawi a, complaint an thehlut a ni. Vote hi khawl hmang chauha chhiar a nih avangin chhiar ṭhat leh an phut a, hei hi Parliament chuan ngaihtuahin a remti ta a ni.