MH370 zawn hna tihtawp a ni ta

Kum 2014-a chin hriat loha awm, Malaysia Airlines thlawhtheihna flight MH370 zawn hna chu nimin khan official-a tihtawp a ni ta.

Kuala Lumpur aṭanga Beijing pana thlawk, mi 239 chuanna flight MH370 hi kum 2014, May 8 khan chin hriat lohin a awm a ni. Thlawhtheihna hi khawmual leh tuipuiahte nasa taka zawn a ni a, Indian Ocean-ah pawh km 120,000 bialah thlawhtheihna tla hi zawn a ni. Thlawhtheihna them ṭhenkhat chu hmuh ni mah se a thlawhtheihna tak hi tun thlengin hmuh a la ni lo.

Ram hrang hrangten thlawhtheihna bo hi an zawnpui a, mahse nikum January thla khan Australia, Malaysia leh China ten thawkhoa an zawnna chu tihtawp a lo ni tawh a ni. Hemi hnu hian Malaysia sorkar chuan US company, Ocean Infinity chu thlawhtheihna tla zawng tur hian a chhawr zui a ni.

Ocean Infinity hian mini-submarin pariat hmangin Indian Ocean-ah km 80,000 biala zauah a zawng zui leh a ni. Company hian sum pe loin zawn hna thawhsak a remti a, hemi rual hian thlawhtheihna tla hi a hmu a nih chuan Malaysia sorkar hian lawmmanah dollar maktaduai 70 pek a tiam thung.