Palestine-in Jerusalem-a inkhel lo turin Argentina ngen

Palestinian Football Association (PFA) chuan Argentina hnenah June thlaa Jerusalem-a Isarel nena friendly football match an neih tur chu ṭhulh turin a ngen.

Thawhṭanni khan Argentine Football Association, South American Football Confederation leh FIFA hnenah lehkha thawnin, PFA President Jibril Rajoub chuan Jerusalem-a inkhelh tur chu an duh loh thu a sawi. Israel chuan sport chu politics khelhna hmanruaah a hmang nia sawiin, Rajoub chuan June 9-a Israel leh Argentina ten friendly football match an khelhna tur Teddy Stadium awmna chu kum 1948-a Israel sipaiten an tihchhiat tak, Palestinian khua a ni ṭhin a ni, a ti.

Palestinian ram luahsaktu, Israel chetdan chu sport thuthlung kalh a ni tih a sawi a, he inkhelh tur hi kaltlangpui a nih chuan Argentina chuan sawizui a hlawh phah dawn a ni tiin PFA president chuan a sawi. Israel chu dik lo taka Argentina mipuite rilru hruai kawi sak a, Jerusalem chu Juda-te khawpui, ṭhen darh theih loh angah a ngaih tir a ni, a ti bawk.

Hetih lai hian mi 31,733 lenna, Teddy Stadium-a Israel leh Argentina te inkhelh turah hian ticket lei tum hi mi nuai ruk chuang zet an awm tawh niin fixture organiser, Daniel Benaim chuan a sawi thung.

Israel-in Palestinian ram a luahsak titawp tura phuttu leh, Palestinian te dikna chanvo ang khata pek phuttu, Boycott Divestment and Sanctions (BDS) movement pawhin Argentina hi inhnukdawk tura phutin campaign an nei mek bawk.