May thla hnua UK-a Covid-19 vang thi tam ber ni thleng

UK-a health official-te chuan Thawhlehni khan an ramah Covid-19 vanga thi mi 532 an awm thu tarlangin, hei hi May thla hnuah ni khat thil thua hripui vanga UK-a thi an tam ber ni a ni.  

Thawhlehnia thite nen hian UK-a Covid-19 vanga thi tawh zawng zawng hi mi 49,770 an awm tawh a ni. Hemi ni vek hin hri kai thar mi  20,412 an awm bawk. UK-a hri kai hmuh chhuah tawh hi mi 12,33,775 an tling tawh.  

Britain National Health Service (NHS) test and trace program-a an hotupa Dido Harding chuan favang laia school leh university-a test neih an tum lawk tawh chu, hri kai an pun chhoh avangin an ruahman lawk aia tam test hi neihpui an ngai dawn tih a sawi.

 

UK health secretary Matt Hancock chuan an rama Covid-19 hri kai an tam chhoh em avang hian an sorkar chuan test runpui neih a tum thu a sawi.  Liverpool-a test runpui an neih kha a hlawhtlin thawkhat thu a sawi a, sorkar chuan khaw hrang hrangah test runpui hi chhunzawm a tum tih a sawi a ni.