Thlan lunga swastika ziaktu thubuai siamsak
US-a Illinois state-ah mi pakhat chu thlanmuala thlan lung 200 vela German Nazi pawl chhinchhiah, swastika lem a lo ziah hnawk avangin thubuai siamsak a ni.
St Louis khawpui bul, Glen Carbon-a Sunset Hills Cemetery-ah kar kalta kartawp lam khan rawng dumin thlan lungte hi lo ziak hnawk a ni. He thlanmualah hian veteran 1,300 vel thlan a awm a ni. Police-te chuan security video aṭangin pawikhawihtu hi an zawng nghal a, kum 34 mi Timothy McLean chu an man ta a ni. McLean hi thubuai pali siamsak a nih thu an sawi.