Starbucks-in hnathawkte training pe turin dawr 8,000 chuang a khar

Coffee chain Starbucks chuan Thawhlehni khan US ram chhung hmun hrang hrangah an dawr 8,000 chuang chu hnathawka an chhawrte hnenah chi inthliarna lam hawi duh lohna zirtirna an pek duh vangin an khar.

April 12 khan Philadelphia Starbucks-ah mihang pahnih, Rashon Nelson leh Donte Robinson te chu man a ni a, hei hi chi inthliar vang nia sawiin lungawi lohna pawh nasa taka lantir a lo ni tawh a ni. Nelson leh Rabinson te hi dawr chhungah an ṭhian pakhat nghaka an luh hnuah pakhat zawk hian toilet hman a dil a, mahse staff-te chuan customer an nih loh avangin an lo remti lo a, hun eng emaw chen an awm hnuah manager chuan police-te phone-in a bia a, police-ten an man ta a ni. Hei vang hian hnathawktute chu anmahni dawrtute laka inthliarna kalpui lo tura zirtirna pek hi an rel a ni. Thawhlehnia training an pek, US Starbucks-a thawk hi mi 175,000 zet an tling.

Starbucks hi ram 70-ah coffee dawr 25,000 zet a nei tawh a ni. US ami te bakah ramdanga an mi chhawrte pawh training pek zel an tum thu Starbucks executive chairman Howard Schultz chuan a sawi. US rama ni khat chhung an dawr an khar avanga Starbucks-in a sum hloh hi dollar maktaduai 12-14 vel nia chhuht a ni. Mi tam takin thawktute training pek an nih dan chu sawisel mah se, mihang official leh activist-te erawh chuan lawmawm an tih thu an sawi thung.