US-ah Covid-19 kai maktaduai 2 chuang tawh

United States (US) chu khawvel a hri leng mek, Covid-19 kai tamna leh he hri vanga thi tamna ber ram a la ni chhunzawm zel. US-ah hian hri kai hi 20,00,464 an awm  tawh a, thihpui mi  1,13,000  an awm tawh bawk. Hetih lai hian hri kai enkawl dam 5,33,000 chuang an awm tawh bawk. 

US-ah hri kai tam zualna state New York, New Jersey, Connecticut leh Massachusetts-ah chuan hri leng hian ziaawm lam a pan a, mahse Arizona, Florida, Texas, North leh South Carolina lamah an pung chak leh thung. 

Hri leng vanga thla thum dawn khar a nih hnuah, Disneyland chuan California-a an theme park chu July 17-ah an hawng tawh dawn tih a sawi a, Downtown Disney District chu July 9 hian hawn a ni dawn tih a sawi bawk. Ram chhunga an hmun hrang hrangte chu a tahtawlin an hawng chho dawn tih company chuan a sawi. 

Russia-ah pawh hri kai an pung chak hle a, Nilaini khan kai hmuh chhuah thar mi 8,779 awmin hri kai hmuh tawh hi 5,00,000 an chuang tawh a ni. Covid-19 thihpui hi Nilaini khan mi 174 awmin, he hri vanga thi hi mi 6,532 an tling tawh a ni.