Sudan security force-ten PM leh minister-te an man

Sudan-a security force-te chuan Pathianni khan an ram prime minister Abdalla Hamdok leh minister ṭhenkhatte manin an hreng mek. PM chenna hmun hi sipaiten an veng nghal niin information ministry chuan a sawi bawk.

Thla hmasaa sipai chakna hmanga sorkar paihthlak tumna a hlawhchham hnuah, Sudan-ah hian sipai leh civil sorkar hotute inkar boruak hi a chhe chho hle nia sawi a ni.

Information ministry chuan sipai lamin thuneihna chan an tumnaah PM hian a thlawp duh loh avangin sipaite hian a chenna inah kalchilhin an man a, a hnuah hmun dangah hruaiin an hruaina hmun hi an puangzar duh lo tih a sawi.

PM bakah industry minister Ibrahim al-Sheikh leh Sudan khawpui Khartoum governor Ayman Khalid pawh sipaiten an hren zingah hian an tel a, information minister Hamza Baloul, PM media adviser Faisal Maohammed Saleh leh Sudan sorkar thupuangtu Mohammed al-Fiky Suliman-te pawh an man tel a ni.

Sipai hian Khartoum pawhtu kawngpuite leh leite pawh an dang vek a, inbiakpawhna lamah pawh mipuite harsatna an tawk chho mek bawk. Airport khar niin international flight pawh tihtawp rih a ni bawk. Heti hian civil hruaitute hren an nih chungchangah sipai lam hian thuchhuah an la siam lo a, an tihchhuah thuai erawh rin a ni. Sudan state TV-ah te chuan ram hmangaihna lam hla hlir tihchhuah a ni.

Kum 2019 khan hun rei tak Sudan ram hruaitu lo ni tawh, Omar al-Bashir chu mipuiten bang tura nawra hun rei tak nawrh an huaihawt hnuah paihthlak a ni a, hemi hnu hian sipai leh civil lam hian thuneihna insemin sorkar an siam a, nakkum kum tawp lamah inthlanpui neih tura tih a ni.