Amnesty-in Hong Kong-a an office 2 khar dawn

Amnesty International chuan Hong Kong-a an office pahnih chu kumin kumtawpah an khar dawn tih an sawi.

London-a hmunpui nei, Amnesty chuan research, advocacy leh campaign hnate chu office dang aṭangin an thawk chhunzawm tawh mai dawn tih an sawi bawk.

Hemi chungchanga nimina thuchhuah an siamah, Amnesty International Board chair Anjhula Mya Singh Bais chuan, "He thutlukna hi harsa ti tak chungin kan siam a ni. Hong Kong-a national security law thar hman chuan human rights organisation-te chu Hong Kong-ah zalen takin hna a thawh tir theih tawh lo a ni," a ti. 

Hong Kong chu international civil society organisation-te tan regional base ṭha tak a ni ṭhin a, mahse tun hnaiah sorkar sawisel zawnga aw chhuahte, human rights leh trade union-te chu bitum an ni ta fo tih sawiin, hetiang boruak ṭha lo tak hnuaiah an tan hnathawh zel a harsat thu a sawi.