Israel-in West Bank-ah in 1,300 chuang sak belh dawn

Israel sorkar chuan Palestinian ram a luah, West Bank-ah Juda-te chenna tur in 1,300 chuang sak belh leh dawn.

Prime minister Naftali Bennett kaihhruai sorkara ministry of construction and housing chuan Pathianni khan 1967 Six-Day War-a an lak, West Bank-a in 1,355 sakna turin sorkar chuan tender a tichhuak tih a sawi. Housing minister Zeek Eking chuan West Bank-a Juda mite tam zawk awm tir leh thuam chak chu 'Zionist vision' atana thil ṭul a nih thu a sawi bawk.

West Bank-a Israel sorkarin in a sakah hian Juda mi 4,75,000 vel an cheng mek a, heng mite chentir an nih dan hi Palestinian lam chuan international law kalh a ni tih an sawi.

Israel sorkar hmalak thar tumna hian sawi zui a hlawh nghal hle a, Palestinian-te bakah ram dangte pawhin an sawisel a ni. Anti-occupation group Peace Now chuan Israel PM hlui Benjamin Netanyahu thlaktu, PM Bennett kaihhruai sorkar chu a danglam chuang lo niin an sawi a, "Midang ram luahsak chungchanga Netanyahu-a policy chu chiang takin an rawn chhunzawm ve nghal a ni," an ti.

Israel PM thar, Naftali Bennett hi Palestinian state hran din dodaltu a ni a, thuneihna a chan chhungin Palestinian Authority (PA) nena peace talk an neih dawn loh tih sawiin, economy lama hmasawnna lam chu a ngaih pawimawh zawk tur thu a lo sawi tawh a ni.