Sri Lanka-in August 5-ah inthlan buatsaih dawn

Sri Lanka Election Commission chuan Covid-19 hri leng vanga ṭum hnih lai Parliamentary inthlan neih hun tur a sawnhlat hnuah, August 5-a inthlan hi neih tum a nih thu a puang.

Inthlan neih tur atana inbuat­saihna turin naktuk hian mock election neih tum a ni. Hei hi an rama hri leng mek karah inthlan neih huna mipuiten inventhiam an zir lawkna atan leh, inthlan buatsaih hi a him tawk dawn em tih enchhinna atana ruhaman a nih thu Commission chairman Mahinda Deshapriya chuan a sawi.

Election Commission member Ratnajeevan Hoole chuan an rama health department-in guideline a siam zulzuiin inthlan hun tur hi ruat a nih thu a sawi a, health lama thuneitute phalna leh anmahni rawn chhunga inthlan hi neih tum a nih thu a sawi bawk.

April 25 leh June 20 khan inthlan hun hi ṭum hnih ngawt ruat a lo ni tawh a, mahse an ramah hri kai an pun chhoh zel avangin, mipuite himna turin an sawn hla leh zel a ni.  

Kum 2018 khan president Maithripala Sirisena chuan Parliament chu ṭhiatin, inthlan hun atan January 5, 2019 a ruat. Mahse hei hi Surpeme court-a khin a nih hnuah SC chuan inthlan hun hi a tikhawtlai a, hemi hnu kumin April 20 khan EC chuan inthlan hun tur hi a puang a, mahse hri leng vangin tihkhawtlai a ngai leh ta a ni. 

Sri Lanka-ah hian Covid-19 kai hi mi 1,869 an awm tawh a, heng zinga mi 1,122 chu enkawl dam tawh niin, he hri vanga thi hi mi 11 an awm tawh bawk.