China-ah tuilianin chenna in 1,300 chuang tichhia

China ram laili lai leh chhim lamah ruah sur nasa avanga tui lian chuan chenna in 1,300 chuang a tichhe tawh. Thi leh chin hriat loha awm eng emaw zat an awm bawk. 

Ministry of Emergency Manage­ment chuan tuilian vang hian mi nuai 2.2 vel chu hmun him lamah an insawnchhuak tawh tih a sawi a, tuilianin thil a tihchhiat hlut zawng  dollar maktaduai 500 chuang a ni tawh nia chhut a ni bawk. Chenna in 1,300 chuang chu tuilian hian a tichhe tawh a ni. 

Guangxi Zhuang Autonomous Region-ah chuan tuilianin chhiatna a thlenah mi paruk an thi tawh a ni. Khualzinten an tlawh nasat ṭhin, Yangshuo pawh tuiin a chim nasa a, khawchhung mite leh khualzin awm mekte pawh hmun him lamah an inthiarchhuak a ni. Local government chuan tuilian hian hotel 1,000 chuang a chim bakah, tourist site 30 vel a chhe bawk tih a sawi. 

Hunan Province-ah pawh ruahsur nasa avanga chhiatna thlengah mi 13 an thi a, chin hriat lohin mi eng emaw zat an awm bawk. 

June thla tir aṭang khan ruah hi nasa takin a sur deuh reng a, central leh south China lama lui 110 chuan hlauhawm chhinchhiahna an pel tawh hlawm a ni. Ruah hi a la sur chhunzawm zel dawn niin khawchin zirtute chuan an sawi.