Sudan sipaite laka lungawi lohna lantirnaah mi 7 an thi

Sudan sipaiten Thawhṭannia sorkar thuneihna an hnehchhuh duh lohna lantira nawrh huaihawtte chu sipaite nen innawrbuaiin mi pasarih an thi a, mi dang 140 velin hliam an tuar bawk niin health ministry official chuan a sawi.

Sorkar thuneihna hnehchhuhnaa an hotu General Abdel Fattah al-Burhan chuan kum hnih liamtaa Omar al-Bashir ban a nih hnuah sipai leh civil miten thawhdunna sorkar din, Soveregin Council chu a ṭhiat nghal a ni.

Burhan hian ram pumah state of emergency a puang nghal a, kum 2023-ah ram inthlanpui neihpui a tiam thu leh mipuite thlantlin sorkar chungah thuneihna hlan a tum thu a puang. "Kan ramin kan paltlang mek hi thil hlauhthawnawm tak, ṭhalaite beiseina leh hmathlir neihte tichhe thei a ni," tiin sorkar thuneihna an hnehchhuh chhan a sawi.

Hetih lai hian sipaiten an paihthlak, prime minister Abdalla Hamdok thlawptu, information ministry chuan ram danpui an hman mekah prime minister chauh chu state of emergency puang thei a nih thu sawiin, sipaite thiltih chu dan bawhchhiatna a ni, a ti. Hamdok chu danin a pawm an ram hruaitu a la ni reng a ni, tiin Facebook page kaltlangin an tarlang. PM Hamdok hian sipaite hnena thuneihna hlan chhawng tura an tihna chu a thlawp duh loh avangin sipaite hian manin an hreng mek a, an hrenna hmun hi a sawilang duh lo a ni.

U.N. Security Council chuan nimin khan Sudan chungchang hi a ngaihtuah nghal nia sawi a ni.

White House thupuangtu Karine Jean-Pierre chuan, "Sipaite hmalak dan hi kan hnawl a, prime minister leh an chenna ina an hren mek midangte chhuah nghal turin kan ngen a ni." a ti.

Sorkar ding lai an paihthlakna duh loh vangin ṭhalaite chuan kawng dangin sipaite nen pawh innawr buai zui a ni. Eptu ṭangrual pawl lian ber, Forces of Freedom and Change chuan sipai rorelna paihthlakna turin mipuite chu tharum thawhna thlen loh zawnga nawrh huaihawt turin a chah.

Sipaite hian Sovereign Council sorkara civil member leh sorkar mi pawimawh ṭhenkhatte pawh an man a, an man zingah hian state TV news director leh a chhungte pawh an tel.

U.S. State Department chuan Washington-in Hamdok-a chinchang leh dinhmun engmah puanzar tur an nei lo tih a sawi a, Sudan ṭanpuina tura USD mtd 700 an ruahman pawh an titawp rih tih a sawi bawk.