ASEAN virtual summit nei ṭan

Association of Southeast Asian Nations (ASEAN) summit chu Thawhlehni aṭang khan virtual hmangin neih ṭan a ni ta.

Virtual conference hi Brunei kaihhruaihna hnuaiah neih a ni a, Covid-19 hripui leng hmachhawn dan tur leh ram ei leh bar tihhmasawn dan kawngte sawiho a ni ang.

Kumina ASEAN summit thupui hi "We Care, We Prepare, We Prosper," niin, Covid-19 hripui leng karah ASEAN ramte'n harsatna an paltlang dan tur kawngte, an inralrin dan tur te, an thiamna te ṭha zawka hmanchhuah theih tura an inhrilh hriat tawn theihna kawngte leh ṭangrual taka an hmachhawpte tihhlawhtlin dan kawngte chu sawiho tur zingah a tel.

Thawhlehni aṭanga Ningani thlenga hman tura ruahman,38th leh 39th ASEAN Summit hi ASEAN thawhpui ram China, Japan, South Korea, India, United States, Australia leh Russia te'n an chhim ang.

Kum 1967-a din, ASEAN-ah hian Brunei, Cambodia, Indonesia, Laos, Malaysia, Myanmar, the Philippines, Singapore, Thailand leh Vietnam an awm.Brunei hian kum 2021 atana ASEAN chair hna chelh mek a ni.

ASEAN hruaituten a hmaa an lo rel tawh angin tun ṭum summit-ah hian Myanmar ram sipai hotu chu a tel an remti lo a, hei vang hian Myanmar aiawh pawh an tel ve ta lo a ni. Myanmar civil sorkar paihthlatu, sipai sorkar hotu general Min Aung Hlaing chu Myanmar tualchhung buaina thleng mek tihtawp tura ASEAN hruaituten nena inremna an lo siam tawh kengkawh loah puh a ni a, hei vang hian October 15 khan Myanmar sipai hotu telh loh hi an lo rel tawh a ni.