US National Security Advisor-in Myanmar civil sorkar aiawhte kawm

US national security advisor Jake Sullivan chuan Thawhṭanni khan Myanmar sipai sorkar dodaltuten civil sorkar aiawh atana an din, National Unity Goverment (NUG) palaite a kawm.

Jake Sullivan hian NUG aiawhte hi virtual meeting neihpuiin, Myanmar rama democracy tundin tuma hmalakna chu US-ina thlawp thu a hrilh a, an ram chhung dinhmunte a sawipui bawk. NUG aiawhte hi Duwa Lashi La leh Zin Mar Aung-te an ni tih White House thuchhuah chuan a tarlang.

February 1-a sipaiten civil sorkar thuneihna an hnehchhuh hnuah, sipai rorelna duh loin Myanmar ram chhung hmun hrang hrangah lungawi lohna lantir chhunzawm reng a nih avangin an ram chhung dinhmun pawh a la ṭha lo hle. Hetih lai hian lungawi lohna lantira buaina chawk chhuakte hi sipaite chuan firfiak tiin, NUG nena inthurualah a puh a ni.

Sullivan leh NUG aiawhte hian Myanmar rama Covid-19 hri leng mek dinhmun te, US-in midang kaltlang loa Myanmar mipuite hnena chhamdawlna pek a tum dante an sawiho bawk.