Sudan sipaite'n PM Abadalla Hamdok an chhuah

Sudan sipaite chuan sorkar thuneihna an hnehchhuh hnua an man, prime minister Abdalla Hamdok chu an hrenna hmun aṭangin in lamah a haw an phalsak ta a, mahse a in pawh hi sipaiten an veng zui nia sawi a ni.

General Abdel Fattah al-Burhan kaihhruaia sipaiten sorkar thuneihna an hnehchhuh hnua PM Hamdok an man chu ram hrang hrangten na taka demin, chhuah turin an phut a, hemi hnu hian Hamdok leh a nupui hi Thawhlehni khan chhuah an ni ta a ni. US chuan Sudan ram chhawmdawlna a pek chu a titawp dawn tih a sawi a, European Union pawhin ṭanpuina pek tihtawpsakah an vau ve bawk. United Nations secretary-general Antonio Guterres pawhin Hamdok chhuah tur hian a phut a, ram hrang hrangte chu sipaiten sorkar thuneihna an hnehchhuh chu dem turin a ngen bawk.

Hamdok office chuan PM aṭanga paihthlak tak leh a nupuite hi chhuah ni tawh mah se, Sudan khawpui Khartoum-a an chenna in chu sipaiten an ven zui thu a sawi.

Sipai hotu, general al-Burhan chuan sipaiten thuneihna an lakna chhan chu an rama tualchhung indona thleng tur danna atan niin a sawi a, sipaite laka hel tura mipuite fuihtu politician-te lakah sipaite chuan thlan tur dang an nei lo a ni, a ti.

Hetih lai hian sipai rorelna duh lohna leh democracy tundin phutin Sudan khawpuia mi tam takin lungawi lohna an lantir chhunzawm zel. Kawngpuite dangin motor ke-te an hal a ni. Nawrh huaihawtte leh sipaite innawrbuainaah Thawhṭanni khan mi pasarih thiin, mi dang eng emaw zatin hliam an lo tuar tawh bawk.