China-i'n Taliban sorkar USD mtd 1 pe, chhawmdawlna pek belh dawn

China chuan Afghanistan-a rorellai Taliban hnenah chhawmdawlna USD maktaduai khat a pe. Hei bakah hian USD maktaduai nga hu chhawmdawlna pawh a pek belh dawn bawk a, a pek tur zingah hian damdawi leh ei turte a tel tih Taliban thupuangtu Zabihullah Mujahid chuan a sawi.

Thawhṭanni-a Qatar khawpui Doha-ah China Foreign Minister Wang Yi leh Taliban sorkar Deputy Prime Minister nilai Mullah Abdul Ghani Baradar te'n inbiakna an neihah khan China chuan Afghanistan ram dinhmun sawhngheh leh siamtharna turin Taliban-te chu puih a tiam a ni. Hei hi Taliban-ten Aghanistan-a thuneihna an chan hnuah ram pahnih hruaituten hmaichhana inbiakna an neihna hmasa ber a ni.

Meeting-ah hian State Councillor ni bawk, Wang chuan Afghanistan hian chona chi li an hmachhawn mek a, chungte chu mihring dinhmun harsa tak te, ram eibar zawnna kawnga harsatna te, firfiakte rikrapna te leh sorkar inrelbawlna lamte a nih tih sawiin, heng an harsatnate an sutkianna tur hian ram dangte an hriatthiam leh an ṭanpui an mamawh a ni, a ti.

Wang chuan US leh khawthlang ramte chu Taliban an hreknate hlip a, inbiakna neihpui a, Afghanistan ram boruak ṭha a awm chhoh theihna tura pui turin a sawm.

China chuan a theihtawpa Afghanistan ṭanpui chhunzawm a tum tih Wang chuan a sawi a, an economy dinhmun pawh siamṭhat a nih theihna tura pui turin ram dangte pawh thawpui an tum tih a sawi.

Thla hmasa khan United Nations hotu Antonio Guterres chuan khawvel ram dangte chu Taliban te nen inbiakna nei a, Afganistan ram economy tlachhe mek chu siamṭhat pui turin a lo ngen tawh bawk. UN chief hian Taliban rorelna hnuaia mihringte dikna chanvo nasa taka palzut theihna hnuaia awm mek Afghan-a khawsak harsa taka ding mek te tana ṭanpuina thawn turin ramdangte hi a ngen a ni.