Saudi Arabia-in sum lama talbuai Pakistan tan USD tld 3 pe

Saudi Arabia chuan sum leh pai lama talbuai mek Pakistan ṭanpuina turin Pakistan central bank-ah USD tluklehdingawn thum a dah sak tih a sawi.

Saudi Fund for Development chuan Thawhlehni khan he thu hi puangin, State Bank of Pakistan (SBP)-ah USD tld thum an chhung lut tih a sawi. Hei bakah hian oil lama insumdawn tawnna kawnga Pakistan puihna turin USD tld 1.2 pe chhuak turin thupek tihchhuah a nih thu a sawi bawk.

He thu hi Pakistan information minister and energy minister Hammad Azhar chuan nemnghetin, "Khawvel huapa thil man sang zel kara kan sumdawnna leh forex account lama nawrna kan tawh mek chu hei hian min chhawk zangkhai dawn a ni," a ti.

Pakistan prime minister Imran Khan chuan Thawhṭanni khan Saudi Arabia Crown Prince Mohammed bin Salman bin Abdulaziz Al Saud chu Riyadh-a Middle East Green Initiative (MGI) summit-an neih kar lakah a hmu a, an ram dinhmunte hi a sawipui a ni.

May thla daih tawh khan federal minister for information Fawad Chaudhry chuan Pakistan oil supply facility-te tihnun thar lehna turin Saudi Arabia chuan a thuphungin sum puk tir a remtih thu a lo sawi tawh a ni. Tun thla tir lam khan finance minister Shaukat Tarin chuan sum puk tir an remtih thu hi a sawi ve leh bawk.

Saudi Arabia hian a hmain Pakistan puihna tur hian financial package USD tld ruk a lo pe tawh a, heng zinga USD tld thum chu State Bank of Pakistan-ah dahin, a bak USD tld thum chu oil facility tan a pe a ni.