Suu Kyi-i sipai court-ah a inlan

Myanmar sipaiten hruaitu aṭanga an paihthlak leh an hren mek, Aung San Suu Kyi chu Thawhlehni khan sipai court-ah inlanin thu zawhfiah a ni.

Kumin February 1-a sipaiten civil sorkar thuneihna an hnehchhuh hnuah Suu Kyi-i bakah hruaitu dang ṭhenkhatte an man zui a ni. Suu Kyi hi man a nih hnuah sipai lam hian thubuai eng emaw zat an siamsak tawh a ni.

Hren a nih aṭanga thla lina, June thla khan court chuan Suu Kyi thubuai hi a ngaihtuah ṭan a ni. Thawhlehni khan court-ah inlan lehin, sipai rorelna sawisel leh dodal tura mipuite fuiha puhna chungchangah amah ngeiin statement a siam. Mahse a thusawi hi court-in a pawmpui hma chuan puanzar theih a ni lo.

Suu Kyi hi sipai sorkar dodal tura mipuite fuiha puh a nih bakah thubuai dang eng emaw zat siamsak a ni tawh a, heng zingah hian phalna nei loa ram danga aṭanga walkie-talkie lalut leh kawl, coronavirus rules bawhchhiat, Official Secret Acts palzut-a puhnate pawh a tel. Heng thubuaiahte hian thiam loh chantir a nih chuan kum rei tak tan tir theih a ni ang.

Thawhlehnia Myanmar khawpui, Naypidaw-a special court-a Suu Kyi a inlannaah hian media mite kal phalsak an ni lo a, hei bakah hian sipai sorkar chuan a legal team pawh media mite hmaa thusawi khapsakin, court rorelna kalpui mek dan pawh an sawi chhuah a khap a ni.

Sipai sorkar hian Suu Kyi-i party, National League for Democracy (NLD) chu sipai rorelna an dodal zel avangin ṭhiah sakah a lo vau tawh bawk a ni.

Assistance Association for Political Prisoners chuan civil sorkar thuneihna hnehchhuh a nih hnua ram chhunga lungawi lohna lantir avanga buaina chhuakah civil mi 1,200 vel chu sipaite kut tuarin an thi tawh niin a sawi. Hetih lai hian sipai sorkar chuan thi zat hi tarlan ai hian an tlem zawk hle niin a sawi. Foreign ministry chuan February leh October inkarah sipai sorkar dodaltu, firfiakte pawikhawihna ṭum 986, bomb hmanga inbeihna ṭum 2,344 leh thil hal vawi 312 a thleng tawh niin a sawi thung.