US-in Israel sorkar ruahmanna thlawp lo

US president Joe Biden kaihhruai sorkar chuan Israel-in West Bank-a Juda-te chenna tur in sak belh a tumna chu a thlawp lo tih sawiin, hei hian Israel leh Palestinian ram siam tuma hma lak mekna chu a tichhia tih a sawi.

State department thupuangtu Ned Price chuan Israel sorkar thil tum hi an hnawl thu sawiin, Palestinian ram china outpost siam 'legalise' tumna pawh a sawisel bawk. "Israel sorkarin mi sang tel awmna tur siam belh a tum hi kan ngaihven hle a ni. He thil hi boruak ṭha a awm theihna tura hmalakna tichhetu a ni," tiin a sawi. Mahse hemi chungchangah US sorkar aṭangin Israel hian a nghawng a tuar dawn em tih erawh a sawilang lo. "Senior level-ah Israel lam nen pawh kan sawi tawh a, kan ngaihdan te chu an hrechiang a ni," a ti.

United Nations pawhin Israel sorkar thil tih tum hi sawiselin, Palestinian ram china Juda-te chenna a sakte chu international law hnuaiah dan kalh vek a nih thu a sawi. European Union pawhin in sak a tumna hi ṭhulh turin Israel chu a lo ngen tawh bawk a ni.

1967 War-a Israel a lak leh a luah zui tak, East Jerusalem huamin West Bank-ah hian Juda mite chenna in sain Juda mi 4,75,000 vel an cheng mek. Kar liam ta khan Israel chuan West Bank-ah hian in 1,355 sak belh a tum thu puangin, tender pawh tihchhuah a nih thu a sawi a ni. Nikum August thla khan in 2,000 chuang sak belh a tum thu a lo puang tawh bawk.

Israel housing minister Zeev Elkin chuan West Bank-a Juda-te dah belh leh tihchak zel chu Israel hma lam hun atana thil ṭul niin a sawi.

Israel leh US hian inlaichinna ṭha tak neiin, US President hlui Donald Trump hnuaiah phei chuan an inkar boruak hi a ṭha hle. President Joe Biden-an thuneihna a chan hnuah pawh amah leh a thawhpuite hian ualau takin Israel hi an la sawisel lo a, mahse kar liam taa Israel-in Palestinian NGO paruk firfiak pawla a puan khan an inkar boruak hi a ṭha chho ta vak lo a ni.