China-ah Covid kai thar an pun avangin khuahkhirhna kalpui leh

China chuan kar liam ta khan ramchhunga province 11 aṭangin Covid-19 hri kai thar mi 100 chuang an hmuhchhuah thar avangin inkhuahkhirhna a tichhuak leh.

National Health Commission (NHC) thu­puangtu Mi Feng chuan, "October 17 aṭang khan China-a tualchhung hmun hrang hrangah hri kai hmuhchhuah thar leh a ni a, chak takin an darh leh mek a ni," a ti. Hri hi nasa zawka a darh zau a hlauhthawnawm hle tih a sawi bawk.

China mipui 75% te chuan Covid vaccine dose bikimin la tawh mah se hri kai hi an rawn pung thar leh ta a ni. Hri a darh thar leh avang hian China sorkar pawhin rang takin hma a la nghal a, a darh zel tur venna turin khuahkhirhna khauh tak a siam nghal a ni.

October 16 khan Shanghai aṭanga khualzin lut, vaccine dose la kim tawh zingah hri kai hi hmuh thar leh niin, hemi hnu hian hri kai hi hmuhchhuah belh an ni ta zel a ni. Pathianni khan mi 133-ten Covid-19 an kai tih hmuh chhuah leh niin, an zinga 106-te chu tour group 13-a mi an nih thu Mi chuan a sawi.

Ramchhunga province leh region hmun thuma ṭhena hmun khatah hri kai thar an awm leh tawh a, Inner Mongolia, Gansu, Ningxia, Guizhou leh Beijing te chu medium- leh high-risk region-a puan an ni.Thuneitute chuan travel agency-te chu heng region chhungahte hian zin veivah khapna thupek a tichhuak nghal a ni.

Hri darh tur venna atan hian province 11-ah mass testing neih leh mek a ni a, inter-provincial tour group-te pawh an titawp hrih a, khualzin tam tak an tangkhang mek bawk.

Pathianni aṭang khan China khawpui, Beijing chhunga lut turte tan khuahkhirhna siam nghal a ni a, khualzinte chu coronavirus negative test report nei leh, khawpui chhunga an awm hnuah pawh ni 14 chhung an hriselna dinhmun enfiah reng tura tih an ni. Beijing-ah hian ni thum chhungin hri kai thar 14 hmuh chhuah an nih thu Beijing Municipal Health Commission report chuan a tarlang. Khawpuia chengte pawh thil pawimawh tak a nih loh chuan hmun danga zinchhuak lo tura tih an ni.

Nakkum February thlaa Winter Olympics an thlen dawn avangin Beijing khawpuia Covid hri a darh hi an hlauthawng hle. Ram dang nena khaikhinin hri kai zat hi tlem mah se, ram hruaitute chuan Covid hri kai awm lohna hmuna siam tumin, kaihhruaina dante pawh khauh taka kenkawh a ni. Mi paruk chu Covid-19 rules an bawhchhiat avangin criminal case siamsak an ni tawh. An zingah mi pahnihte chu Covid-19 kai khualzin kal tamna, Inner Mongolia aṭanga an rawn let hnuah khawsik nei chungin thil ei turin pawnah chhuakin an ṭhian ṭhenkhatte pawh an sawm a ni. Midang pahnihte hi an veng hungna pal zuankana an tlanchhuah vanga man an ni bawk. October 31-a neih tur marathon pawh an ṭhulh a, an neih leh hun tur hi puanzar a la ni lo.

Thawhlehni aṭang khan mi maktaduai li chenna, Lanzhou khawpuiah lockdown puangin, he khawpuia chengte chu emergency thil a nih loh chuan an chenna chhuahsan lo turin hriattir an ni. Bus leh taxi service pawh tihtawp niin, rel staton pawh khar lailawk an ni bawk. Beijing-Lanzhou inkar thlawhtheihna service pawh mipuite himna turin tihtawp a ni a, an sevice theih leh hun tur pawh puan a la ni lo. Health official-te chuan test tam zawk neih chhoh a nih dawn avangin hri kai pawh hi an pun belh thei tih an sawi.