Europe-in Covid hri leng thawh thumna an hmachhawn ṭan mek em?

Europe ram chu kar liamta chhunga khawvel huap region zinga coronavirus kai leh thihpui punna awmchhun niin, an punna zat hi digit hnih chung lam ve ve a nih thu United Nations health agency chuan Nilaini khan an sawi.

World Health Organisation chuan Europe region-a ram 53-ah kar liamta chhung khan Covid-19 kai thar 18% in an pung a, kar li chhung a zawnin an pung tawh niin a tarlang.

WHO-in weekly epidemio­logical report on COVID-19 a tihchhuahah, Europe-ah hian kar liam ta chhungin hri vanga thi hi 14% in an pung a ni. Hri kai hmuhchhuah thar pawh maktaduai 1.6 chuang niin, thihpui hi 21,000 chuang an awm bawk a ni.

United States-ah kar liam ta chhungin hri kai thar 5,13,000 an awm bawk a, a kar hmasa aiin 12% in a tlahniam. Hemi hun chhung vek hian thihpui 11,600 an awm a, a kar hmasa nen thihpui zat hi a in tlukvel niin WHO chuan a sawi.

Britain-ah chuan kar khat chhungin hri kai thar 3,30,000 an awm bawk. Tunhnaia hri vanga thi tamna Russia chuan kar liamta khan hri kai thar nuai hnih chuang an awm bawk.

WHO official-te chuan hri kai an pun leh chhanah hian Europe khawchhak lama ram ṭhenkhatah vaccine la an tlem vang niin an ngai a, Ukraine, Romania, Bulgaria, Moldova leh Georgia-te chu hri kai thar a tam zualna niin kar liam ta khan mi nuai khat velin an kai thar a ni.

America region chu region dang zawng aia hripui vanga thi tamna ber a la ni a, mi mtd 2.7 chuangin an thihpui tawh a, kar liamta khan thi zat hi 1% in an pung leh bawk a, hri kai thar erawh 9% in an tlahniam thung. Southeast Asia, India leh Indonesia-te telna bialah kar liam ta khan hri kai thar 13% in an pung a, thihpui zat erawh 8% in an tlahniam.