China-i'n building sang taka sak phal lo ; China sorkar chuan khawpui tê zawka inchhawng sang taka sak khapna a tichhuak

Sorkar thuchhuah chuan mipui maktaduai thum aia tlem chenna khawpuiah chuan inchhawng sang, skyscraper metre 150 (492 ft)aia sang sak a khap. Mi maktaduai thum aia tam chenna hmunah chuan metre 250 aia sang sak phal a ni lo bawk.

An dan hman mekah inchhawng hi metre 500 aia sanga sak khap a ni, hei hi a siamṭha leh a ni.

China hi khawvela inchhawng sang tak tak awmna hmun niin, heng zingah hian metre 632-a sang Shanghai Tower leh metre 599.1-a sang Ping An Finance Centre, Shenzhen-ah te an nei a ni.

Inchhawng sang chi te hi mipui chen tamna khawpui Shanghai leh Shenzhen-ah te chuan mamawhna awm mah se khawpui tenau zawk, ram awl zau tak la awmnaah chuan intihtheihna vang maia din an nih thu report ṭhenkhat chuan an tarlang.

Kumin kumtir lam khan Shenzhen khawpuia SEG Plaza skyscraper, metre 350 a sanga awm a insawi nasat avangin mi tam tak chu hlauin an lo tlanchhe tawh a ni.

Sorkar chuan project man to tak tak, mipuite mit lak tumna avanga in sang tak tak sak tumnate chu a titawp chho mek a ni. Kumtir lam vek khan thilsiam pian hmang mak tak tak "ugly architecture" siam khapna a lo tichhuak tawh bawk.

Thawhlehnia thuchhuah inṭawm an siamah, Ministry of Housing and Urban-Rural development leh Ministry of Emergency Management-te chuan mipui maktaduai thum tling lo chenna khawpui te'n inchhawng metre 150 aia sang an sa duh a nih chuan chhan ṭha tak an nei tur a ni, tiin an sawi. Eng thilah pawh ni se, inchhawng metre 250 aia sang chu an sa thiang lo hrim hrim a ni, an ti.

Hetiang bawk hian mipui maktaduai thum aia tam chenna khawpuiah chuan chhan ṭha tak an nei a nih chuan metre 250 aia sanga sak an dil thei a, mahse metre 500 a pel thiang lo thung a ni.

He dan siam thar bawhchhiate chu chu damchhunga hremna pek theih an ni dawn tih thuchhuah chuan a tarlang bawk.