Ram dangte'n an dodal chungin Israel-in West Bank-a in sakna tur buaipui mek

Israel sorkar chuan Palestinian ram a luah, West Bank-a Juda mite chenna tur in sak belh a tumna chu ram leh pawl hrang hrangten sawisela an dodal chungin kaltlangpui a tum a, a buaipui mek. Israel sorkar ruahmanna sawiseltu zingah hian US pawh a tel.

Israel defence official chuan Israel liason office chuan West Bank-a in 1,334 sakna tur hian phalna a pe tawh tih sawiin, permit pek chhuah tura thutlukna chu defence minister Benny Gantz kutah a innghat tawh a ni, a ti.

Palestine Liberation Organization-a Executive Committee member Bassam Al-Shale chuan far right politician, Naftali Bennet kaihhruai sorkar thar chu a thlak tak, Benjamin Netanyahu kaihhruai sorkar nen danglamna a awm lo tiin na takin an sawisel. US sorkar chuan ṭawngkamin sawisel mah se, a takin engmah a ti lo a, president hmasa Donald Trump hun laia Israel duhsakna policy an lo siam tawh pawh thlak danglam tumna a awm lo a ni, a ti.

Israel prime minister Naftali Bennet hi a hma aṭanga Palestinian ram hran din dodaltu a ni a, thuneihna a chan hnuah Palestinian ram an luaha Juda mi chengte chuan in sak belh tur hian an nawr a ni. Hetih lai hian ram dang tam zawk chuan Israel-in a ram luaha in a sak hi dan kalh niin an sawi thung.