US-in Afghanistan ṭanpui nan USD mtd 144 pe dawn

United States chuan Taliban rorelna hnuaia awm mek, Afghanistan rama mipui nitin khawsaknaa harsatna tawk mek te ṭanpui nan USD maktaduai 144 an pe dawn tih Secretary of State Tony Blinken chuan a sawi.

Heng ṭanpuina sumte hi Taliban sorkar kaltlang loin, independent international leh non-governmental humanitarian organisation - United Nations High Commissioner for Refugees (UNHCR), United Nations Children's Fund (UNICEF), International Organization for Migration (IOM), leh World Health Organization (WHO)-te hnenah pek a ni dawn a, an sum pekchhuah dante pawh uluk takin an thlithlai zui zel dawn tih Blinken chuan a sawi bawk.

"He sum sum hi Afghanistan-a cheng leh an ṭhenawm rama tlanchhia, mi maktaduai 19 chuangte chhawmdawlna turin pek a ni," a ti. He ṭanpuina sum an pek leh tur nen US hian Afghnaistan mipui leh Afghan raltlante tan kumin chhungin USD maktaduai 474 a pe tling dawn a, ram dang zawng aiin ṭanpuina sum hi an pechhuak hnem ber dawn a ni.

"Kan thawhpuite nen nunna tam tak kan chhanhim thei dawn a, eitur, venhim kawnga puihna, healthcare-a ṭul leh mamawhte, thlasik lo thleng tura mamawhte, riahbuk leh chenna tur neih loh vanga enkawlna ṭha dawng thei lo te , Covid-19 hripui leng, khawkheng, taksa tana chaw ṭha dawng pha lo te, thlasik lo thleng tur atana inbuatsaihna atan a pui thei dawn a ni," tiin secretary of state chuan a sawi."Heng ṭanpuina hi Taliban ni loin Afghanistan mipuite tana tih a ni," a ti.

Afghanistan raltlante lo dawngsawngtu, an ṭhenawm ramte chungah Blinken chuan lawmthu sawiin, an ramrite pawh hawnsak chhunzawm zel turin a ngen. "Mipui tana chhawmdawlna rawn lut hmang hian Afghanistan ram chhunga chengte bakah refugee-te nunna hlu tak chhanhim leh venna kawngah kan thawhpuite chu kan puibawm zel dawn a ni" tiin Blinken chuan a sawi.