Kim Jong-un-a'n an ram mipuite thil ei titlem turin ngen

North Korea ram hotu lu ber, Kim Jong-un chuan an ramin ei leh in lam indaih lohna an tawh chhoh mek avangin mipuite chu kum 2025 thleng an ei titlem turin a a ngen.

Hripui a len tirh aṭang khan North Korea hian a ramrite a khar nghal vek a, China aṭanga supply a lakluhte pawh a khar a ni. Hei bakah hian nuclear programme a kalpui avanga ram dangten hrekna an siam avangin ei leh in lam an hmuhna kawngah harsatna a tawh belh bawk. Kumin June thlaa senior leader meeting-a thu a sawiah, Kim Jong-un chuan an ramin ei leh bar lamah harsatna an tawh chungchang hi a lo sawichhuak tawh a ni.

Ramri khar vang leh ram dangte hrekna siamten ei tur supply lam thlenga a nghawng avangin NKorea mipuite mamawh ang zat an lalut thei lo a, hei vang hian ei tur man pawh a sang chak hle. Hetih lai hian thlipui leh ruahpui an tawrh fo vang leh, khawl leh hmanrua dang ṭhat tawk loh vangtein ei tur an tharchhuah pawh a nghawng a, an indaih lo zual phah bawk.

UN World Food Program chuan North Korea mipui zinga 40% vel chuan an taksa mamawh ang ei tur ṭha an hmu pha lo niin a sawi.