Russian journalist kahhlum nia sawi nungdamin inlan

Ukraine khawpui, Kiev-a Russian journalist kahhlum nia sawi Babchenko chu a thih thu puanzar a nih hnuah nungdama hmuh leh a ni.

Kum 41 mi, Babchenklo hi Russian journalist lar ber zinga mi niin, President Vladimir Putin leh a policy-te sawiseltu langsar tak a ni. Babchenko hian vauna a tawh ṭhin avang leh, jail-a tantir mai a hlauhthawn avangin kum 2017 February thla khan Russia chhuahsanin Ukraine hi a pan a ni. Ukraine thuneitute chuan Thawhlehni kahn Babchenko hi Kiev-a a inah na taka kahhliam niin a nupuiin a va hmu a, ambulance hmanga damdawi-in panpui a nih laiin kawng lakah a thi ta niin an sawi a ni.

Babchenko kahhlum nia sawi a nih chungchangah hian Ukraine leh Russia chu ṭawngkam na takin an inbei zui nghal a ni.

Nilaini khan Babchenko hi reporter-te hmaa inlanin, kahhlum nia tarlan anih chhan chu amah thah tuma beihna tihtlawlhna atana tih an nih thu a sawi. Hemi rual hian mipuite hnenah ngaihdam a dil zui nghal a, a bikin a nupui chuan hun harsatna tak a paltlang a ngaih vangin pawi a tih thu a sawi.

Babchenko chuan Ukrainian Security Service, SBU chu lawmthu a hrilh a, a nunna an chhanhim sak niin a sawi. SBU hian Babchenko that tuma phiarrukna a awm thu an dawng tih sawiin, hei hi lo dan tumin ruahmanna an siam ta niin a tarlang.