Italy President-in PM atan Conte ruat leh

Italy President Sergio Mattarella chuan Ningani khan an rama ṭangrual sorkar hruaitu turin Prime Minister atan law professor Giuseppe Conte chu a ruat nawn leh.

Conte hian PM atana ruatna hi pawmin, nimin tlai khan a cabinet minister-te nen lakluh nghal an ni.

Italy-a Five Stare Movement (M5S) leh far-right League-ten ṭangrual sorkar an siam tur kaihruai turin Conte hi a hmain PM atan hian ruat a lo ni tawh a, mahse a cabinet minister tura a ruat ṭhenkhat President-in a pawmpui loh avangin a bang leh nghal a ni. Mahse party pahnihte hian inbiakna an neih ṭhat leh hnuah, Ningani khan President Mattarella hian Conte hi a ko leh a, a minister tura a ruat mi 18 list pawh President hnenah hian a entir nghal a ni. President nena meeting an neih zawh hnua thu a sawiah, Conte chuan sorkar ṭha siam tur leh Italy mipuite dinhmun chawisang tura theihtawp an chhuah tur thu a sawi.

Conte-a cabinet member ah hian M5S hruaitu Luigi Di Maio leh League leader Matteo Salvini-te chu vice prime minister atan dah ve ve an ni ang. Di Maio hi Economic Development leh Labour Minister a ni dawn bawk a, Salvini hi Interior Minister a ni ang.

Ministry pawimawh Economy leh Finance chu University of Rome Tor Vergata-a Political Economy professor leh Italy National School of Public Administration president Giovannai Tria pek a ni dawn a, Minister of European Affairs atan economist Paolo Savona dah a ni dawn bawk.