Myanmar-in Rohingya refugee-te laklet vek remti

Myanmar sorkar chuan an ram aṭanga Bangladesh-a tlanchhia, Rohingya refugee nuai sarih vel chu an kir duh a nih chuan laklet vek an remti tih National Security Adviser Thaung Tun chuan a sawi.

Singapore-a regional security conference, Shangri-La Dialogue neihnaa thu a sawiah Thaung Tun hian a sawichhuak a ni. Bangladesh-a raltlan nuai sarih vel awm mek chu a tahtawla thawn kir an nih dawn chuan an vaia lo dawnsawn vek an remtih thu a sawi. Hemi rual hian Rakhine state-ah indona a awm lo tih sawiin, sipaiten Rohingya hnam thenfai hna an kalpui nia an puhna chu thu dik lo a ni, a ti.

Kumin January thla khan Bangladesh leh Myanmar sorkar hian kum hnih chhunga Rohingya raltlante lak letna tur hian inremna an lo siam tawh a ni. Kar kalta Ningani khan Myanmar leh UN chuan Rohingya mite Myanmar rama him taka hruai kir leh an nihna tur hian inremna an siam leh bawk. Hemi rual hian Rakhine state-a sipaite beihpui thlak chungchangah human rights palzutna a awm leh awm loh chhui chiang turin independent commission din a ni bawk.