Jordan sorkar laka lungawi lohna lantir

Jordan khawpui, Amman-ah Pathianni khan thil man sang zel vanga lungawi loin mipuiten sorkar duh lohna kawngzawh an huaihawt.

Mipui lungawi lo te hi cabinet office bulah pungkhawmin, Prime Minister Hani Mulki chu bang tura an phut thute an aupui a ni. Mipui pungkhawmte chuan thla hmasaa parliament-a tax bill thehluh chu sut a nih chauhin nawrh huaihawt chu an titawp dawn tih an sawi.

Eirukna an duh loh thu te sawiin, an ram lal King Abdullah II chu inrawlh a, official eirute laka beihpui thlak turin an phut bawk. Mipui pungkhawmte hian prime minister office pan an tum a, security force-ten an lo dang a ni.

Kar kalta Nilaini aṭang khan Jordan-ah hian trade union-ten nawrh an huaihawt avangin nunphung pawh a tikhaihlak hle a, Amman bakah khawpui hrang hrangah sorkar chu bang turin an phut a ni. Mipuite chuan thil man sang chak leh chhiah lak dan thar siam chu dodal zel an tum tih an sawi.

Jordan sorkar hian thla hmasa khan chhiah lak thar, income tax draft law a siam chu parliament-ah a thehluh ta, parliament-ah a pawmpui ve leh a ngai dawn a ni. He dan thar siamah hian hnathawktute hnen aṭanga income tax lak chu 5% a tihsan a nih bakah, company aṭanga lak chu 20%–40% a tihsan rawt a ni. Kumin January thla aṭang khan Jordan ramah hian thil man a sang chak hle a, nitin khawsak atana mamawh mante a san bakah, chhiah pawh lakbelh a ni bawk. Fuel man pawh kumin chhungin ṭum nga tihsan a ni tawh a, electric bill pawh February thla aṭang khan 55% in a sang tawh bawk.