Afghanistan-ah school kal lo naupang an tam

UN report thar ber tihchhuahah Afghanistan rama naupang zahve dawn chu security ṭhat loh vang te, retheihna leh inthliarna nasat vangin school an kal lo nia tarlan a ni.

Report-a a lan danin, Afghanistan rama naupang school kal lo hi kum 2002 hnu lama an tam ber a la ni a, naupang zingah mipa naupang aiin hmeichhe naupang school kal lo an tam zawk bawk.

Afghanistan rama naupang kum 7-17 inkar maktaduai 3.7 school kal thei lo zingah hian hmeichhe naupang 60% an awm a, province ṭhenkhatah phei chuan 85%-te an tling a ni. Hmeichhe naupang school kal lo an tam chhan hian naupan laia pasal neih tir an nih vang leh, hmeichhe zirtirtu an awm tam tawk loh vangte a ni tel nia sawi a ni.

United Nations Children's Fund (UNICEF) report chuan school kal mek zingah naupang 300,000 vel chu kumtawp thlenga kal tluan loa an tawpsan leh mai hlauhthawnawm awmin an awm niin a tarlang bawk. Heng mite hi thingtlanga cheng niin, boruak a him tawk loh bakah school facility-te an nei ṭha tawk lo a ni.