Jordan PM Hani Mulki a bang

Jordan ram mipuiten an rama thil man sang chak leh hna neilo an pun chhoh zel avanga sorkar laka lungawi lohna lantira nawrh huaihawt a, Prime Minister Hani Mulki bang tura an phut hnuah Thawhṭanni khan Mukli chuan PM a nihna aṭanga banna a thehlut.

Thawhṭanni khan Jordan lal King Abdullah II chuan an ram khawpui Amman-ah Mulki hi a ko a, Husseiniyeh Palace-a meeting an neihnah Mulki hian banna thehlutin, lal hian a lo pawmsak nghal a ni. King Abdullah hian Education Minister Omar al-Razzaz chu sorkar thar siam turin a hrilh nghal bawk.

Tun hnaiah Jordan ramah hian thil man a sang hle a, hei bakah hian International Monetary Fund rawtna angin sorkar chuan chhiah lakna dan thar, income tax law draft a siam bawk. Hei hi mipuiten duh loin khawpui hrang hrangah nawrh an huaihawt a, prime minister chu bang turin an phut a ni. Nawrh huaihawt hi trade union hrang hrang bakah eptu MP tam zawkin an thlawp a ni.

Kum 2016 May thla aṭanga PM dinhmun chelhtu, Mulki hian trade union aiawhte hmuin income tax law siam tum chungchangah inbiakna neihpui mah se inremna an siam thei lo a ni.