Trump-Kim meeting neih hun tur puang

US President Donald Trump leh North Korea hotu Kim Jong-un ten June 12 hian Singapore-ah meeting an nei dawn tih tihchian a nih hnuin, White House chuan meeting hi Singapore huna zing dar 9-ah neih ṭan a ni dawn tih Thawhṭanni khan a sawi.

White House thupuangtu Sarah Sanders-i chuan Singapore-ah hian US advance team pawh an awm tawh tih sawiin, summit neihna tura atana ṭul leh buaipui ngaite an buaipui mek a, summit zawh hma chu an awm chhunzawm dawn tih a sawi bawk.

US lam chu meeting neih tur atan hian theihtawpin a inbuatsaih zel a ni tih sawiin, Sanders chuan US palaite pawh Korea ram pahnih inrina, demilitarized zone (DMZ)-ah NKorea palaite nen inbiakna an nei mek a ni, a ti. An inbiakna boruak pawh a ṭhain, hma an sawn zel niin a sawi.

US Secretary of State Mike Pompeo pawhin kar hmasa khan NKorea-a rorellai, Paty of Korea Central Committee vice chairman Kim Yong Chol pawh New York-ah a lo hmuk tawh bawk. Hemi hnu hian President Trump pawhin Kim Yong Chol hi hmuin, Kim hian NKorea hotu Kim Jong-un-an Trump-a hnena lehkha a thawn pawh a pe a ni.